「西九高鐵」小學題 (數學/邏輯/常識) - 挑戰全港小朋友！

係咪小兒科,你未必叻過細佬哥!

此題目適合香港小學生、或小學生父母、或任何人自信有小學生程度作答。

小然今早收到由「港鐵友禮會」發出的電郵，電郵題目為「高鐵為誰而建? 」。是一封呼籲港鐵友禮會會員支持興建「西九高鐵」。文章開首是這樣寫的：

「高鐵不是甚麼不切實際的偉大建設，而是為每個小市民興建的高速鐵路，它將連結國內的高鐵網絡，縮短城際交通的時間，由香港市中心至廣州只需48分鐘，到深圳14分鐘！現今跨境工作越趨普遍，屆時，你在廣州放工，就可以準時回港陪家人吃飯；周末，你只需花數小時就可以直達湖南一嚐正宗湘菜；試想想，一條高速鐵路帶來的好處，除了經濟效益，除了不被邊緣化，其實還有很多。」

問題一 (數學題，不是IQ題)
乘坐「廣深高鐵」由廣州到深圳需要多少時間？

問題二 (邏輯題)
如果不興建「西九高鐵」，會不會興建「廣深高鐵」？

問題三 (常識題)
「廣深高鐵」的總站設於廣州和深圳的那兩個地方？

問題四 (常識及數學題)
如果乘坐「西九高鐵」，由深圳福田站到你家需要多少時間？

問題五 (常識及數學題)
如果不興建「西九高鐵」, 由深圳福田站可以到你家嗎，需要多少時間？

問題五A (無聊題)
如果興建「西九高鐵」，你爸爸(或媽媽)在廣州放工，可以準時回港陪你吃飯嗎？
又如果不興建「西九高鐵」，你爸爸(或媽媽)在廣州放工，可以準時回港陪你吃飯嗎？

問題六 (常識及邏輯題)
那麼，你覺得興建「西九高鐵」對你到廣州有多大幫助？

問題七　(常識題)
不興建「西九高鐵」，香政政府可省回多少錢？

問題八　（滋潤題）
不興建「西九高鐵」，省回的錢可以做些甚麼對香港人有利的事？





答案一
34分鐘 (48分鐘減14分鐘，聰明一點的小學生可能會答小於34分鐘。)

答案二
如果不興建「西九高鐵」，「廣深高鐵」不但仍會興建，其實「廣深高鐵」已於2005年動工。兩者沒有必然關係。請參閱維基百科。

答案三
廣州的石壁鎮和深圳的福田。

答案四
如果你的答案是十四分鐘或者十四分鐘多一點，恭喜你! 你（或者你爸媽）將來一定是西九高鐵上蓋物業的業主了，你一定是非富則貴了。因為「西九高鐵」在香港範圍內只有西九一個站，而要在最高時速二百公里的高鐵上中途跳車是不鼓勵的（跳完唔死都困係隧道裡便，聽說要走到菜園村先有緊急出口。菜園村係邊？總之唔近你屋企，要問就去立法會門外問ｄ菜園村居民！快！遲咗佢哋唔知俾人逼遷咗去邊。）所以如果你住在其他地方，例如將軍澳、沙田、大埔、屯門、元朗的「小市民」（小朋友，看清楚題目啊！），時間會因人而異，自己計啦，但千祈不要誤以為高鐵西九站等同東涌線九龍站（都話常識題咯！）。

答案五
一定去到，雖然要在深圳轉車，但時間未必比答案四長。事關你可以選擇直接一些的交通工具，例如東鐵和過境巴士。例如我在福田上的士，皇崗轉過境巴士, 大約一小時多一點便可到灣仔(包埋出入境）。香港很多地方會需要更短時間。不過，小朋友不要盡信我，叫爸爸媽媽帶你走一趟吧！還有，猜猜過境巴士在「廣深高鐵」通車後會不會直達福田站？（這是商業題，哈哈！）　

答案五A
問你爸爸(或媽媽)！　還要問他(她)在廣州的辦公室距離石壁有多遠。如果爸爸媽媽唔知石壁喺邊唔好怪佢地，因為嗰度未開發（咁廣州高鐵站算唔算係市中心？自己諗啦!）。俾小小貼士你，搭將來廣州地鐵七號線，在大石站轉乘三號線就可以去到天河商業區。有幾遠呢？從將來高鐵石壁廣州新客站到而家廣州東站(近天河商業區)都只不過係十六個站大概廿三公里鐵路（轉一次車）。廿三公里鐵路有幾長？（哎呀，快ｄ叫爸爸媽媽幫你搵個通識補習班。講笑咋！）舉個例說，港鐵荃灣線總共十六個站全長十六公里，咁你自己想像下要搭幾耐啦！

最後要問清楚爸爸媽媽幾點開飯，因為題目話明要「準時」（唔好等佢話番最後又番唔到！）

答案六
無標準答案，因地區而異。小朋友，自己想清楚。

答案七
669億港元，但你未必會知道這是多少錢。假設你爸爸(或媽媽) 的平均月薪是二萬元，669億港元大約是一萬個爸爸(或媽媽)一生(假設一生工作三十年) 工作的所有收入。

答案八
答甚麼都可以，甚至你可以答「興建兩條錦上路方案的高鐵」（差唔多夠錢）。但就係唔可以答「興建西九高鐵」（呢d叫做答題技巧，問爸爸媽媽啦！）

當然如果你識答「錦上路方案的高鐵」＋慳番三百億（記住要講點洗，又係答題技巧呀！），就要叫爸爸媽媽培養你將來成為大機構的CFO. 如果你識答共用通道，就要叫爸爸媽媽部署你入香港行政會議（唔講唔知呢個係當年行政會議既定案）。

無論如何，請將答案交給爸爸媽媽，他們應該會把好的答案轉寄給香港政府。


註
此題目沒有版權可言，請隨便轉貼。 (放在FACEBOOK效果更佳, 右邊有個FACEBOOK　button, 睇唔睇到?)

仲有仲有，如果你唔係小學生，是但答錯邊條都好，都要向全港幾百萬人講聲：
高鐵唔係小兒科,我仲”渣”過細佬哥!
（個個都要講，特首都冇情講。）